34. издание на Саемот на книга 2022 се врати во редовниот, пролетен термин на одржување од 3. до 9. мај, во Арена Борис Трајковски, под покровителство на Министерството за култура на Република Северна Македонија, кое традиционално ја поддржува оваа најголема културна манифестација. Бројот на посетители на Саемот на книга 2022 изнесуваше 23.800 и после две изданија на Саемот во пандемиски услови, ја надмина вообичаената посета од страна на читателите и се врати во сопствениот сјај. Покрај враќањето на Саемот на книга во редовниот термин на одржување, се вратија и групните посети за учениците од средните и основните училишта на државата. Како една од најзначајните манифестации од областа на културата, Саемот понуди богата програма за деца и млади со која најмладите посетители можеа да уживаат во светот на книгите. За време на Саемот беа организирани и работилници и промоции на нови изданија за деца. По повод 5ти Мај, Ден на македонскиот јазик на Саемот на книга 2022 се одржа промотивен настан насловен како “Македонски книжевни класици – Подарок за поколенијата!”. На промотивниот настан се даде осврт на најзначајните творци на македонската книжевност: Блаже Конески, Петре М. Андреевски, Оливера Николова, Ѓорѓи Абаџиев, Димитар Солев итн. Во седумте саемски денови се одржаa повеќе од 30 промоции на нови изданија и автори во Промотивниот центар, а имаше гостувања и на странски автори. Значајно претставување имаше Република Турција преку своето Министерство за култура и туризам, а во соработка со Турскиот Културен Центар “Јунус Емре”, при што во рамките на нивниот штанд се одржаа многу активности со уметници и автори од оваа земја.